‘Drive-thru saliva testing’ ng PRC nasa Lipa City na
MANILA, Philippines — Nag-aalok na rin ang Philippine Red Cross (PRC) ng COVID-19 drive-thru saliva testing sa Lipa City, Batangas.
Ayon sa PRC, nakipagtuwang ito sa isang outlet shopping destination sa Lipa para makapagsagawa ng drive-thru saliva testing sa LIMA Estate upang makapag-avail ang mga residente ng lungsod at mga kalapit na lugar, ng COVID-19 testing sa mas kumbinyente, hindi invasive at mas ligtas na paraan.
Nabatid na maaaring makapagpa-saliva test sa naturang lugar ang mga residente mula Lunes hanggang Biyernes ngalas-8:00 ng umaga hanggang alas-4:00 ng hapon sa halagang P2,000 lamang.
Anang PRC, ang collection process ay aabutin lamang ng 10 minuto at ang resulta nito ay direktang ipapadala sa e-mail address ng taong nagpasuri, sa loob lamang ng 12-40 oras matapos ang testing.
Ayon kay PRC Chairman at CEO, Senator Richard Gordon, ang pagpapasuri ay susi upang matuldukan ang pagkalat ng virus. Sa pamamagitan aniya ng mga drive-thru centers na kanilang itinatayo ay magiging mas madali at mas mabilis na ang pagsusuri.
- Latest