Binatilyo natutulog sa dumpsite, pisak sa truck
AROROY, Masbate, Philippines — Kalunos-lunos na kamatayan ang sinapit ng isang 16-anyos na binatilyo matapos na magulungan habang natutulog ng heavy equipment sa dumpsite ng minahan ng Filminera Resources Corporation sa Sitio Buri, Brgy. Syndicate ng bayang ito kamakalawa ng madaling araw.
Kinilala ang biktima na si Kent Bryan Danao Gerez, Grade 9 student at residente ng barangay habang sumuko ang operator ng nakasagasang truck na si Ruel Merioles Saldo, 38, ng Brgy. Puro, Aroroy.
Sa ulat, dakong alas-4 ng madaling araw, habang natutulog ang biktima kasama ang ilan pa sa isang bahagi ng dumpsite nang magulungan ng heavy equipment na DU Triple 7 Caterpillar Truck na ino-operate ni Saldo.
Patay agad ang biktima habang mabilis na nakabangon at nakatakbo ang mga kasamahang natutulog.
Sa imbestigasyon, minamaniobra ng naturang driver papasok sa dumpsite ang truck pero dahil sa dilim ay hindi nito napansin ang mga natutulog sa daraanang bahagi kaya nagulungan ang hindi agad nakabangong biktima.
- Latest