‘Drug queen’ sa Albay timbog sa buy-bust
TABACO CITY, Albay , Philippines — Nadakip na ang isang dalaga na notoryus na tulak ng droga at tinaguriang “drug queen” sa Albay matapos masamsaman ng may P.34 milyong halaga ng droga sa ikinasang buy-bust operation ng mga ahente ng Philippine Drug Enforcement Agency (PDEA) sa loob ng isang motel sa Purok-6, Brgy. Cobo ng lungsod na ito kamakalawa ng hapon.
Sinampahan na ng kaso ang suspek na nakilalang si Grace Botabara Biron, residente ng Purok-4, Brgy.Tayhi, Tabaco City.
Sa ulat, dakong alas-4:30 ng hapon nang ikasa ng PDEA ang buy-bust operation laban kay Biron. Nakipagkasundo ang dalagang suspek sa isang PDEA agent na umaktong buyer na gawin ang kanilang transaksyon sa loob ng Captain’s Inn sa nasabing barangay.
Matapos iabot na ng suspek sa poseur buyer ang isang malaking sachet ng shabu na tumitimbang ng 50 gramo at nagkakahalaga ng P340,000 ay agad siyang inaresto.
Nabawi sa suspek ang boodle money na ginamit sa buy-bust at ilang drug paraphernalia.
- Latest
