Tensyon sa Jaen, Nueva Ecija patuloy
BAGUIO CITY, Philippines — Pinagpapaliwanag ng Supreme Court (SC) si Cabanatuan City RTC Branch 27 Judge Angelo Perez matapos ireklamo ni Mayor Sylvia Austria na nakikipagtagisan ngayon sa katunggali nitong si Antonio Esquivel na kasalukuyang nakaupong mayor ng Jaen, Nueva Ecija.
Inireklamo ni Austria ng administrative at gross incompetence si Judge Perez matapos paboran umano nito si Esquivel sa poll protest na dahilan kung bakit kasalukuyang nakaupo sa puwesto ang huli.
Maliban sa gross incompetence, inireklamo rin si Perez sa Korte Suprema ng “gross misconduct and gross ignorance of the law” dahil sa pagpabor nito sa protesta ni Esquivel.
Dahil dito, tensyonado ngayon ang Jaen matapos hindi na naman pinayagang makaupo si Austria noong Martes ng hapon kahit may “status ante order” na ang Comelec Second Division kontra sa desisyon ni Perez na pumabor kay Esquivel.
Kinastigo naman ni Esquivel ang Comelec status ante order pati ang Sangguniang Bayan resolution na kumikilala kay Austria bilang duly-elected mayor ng Jaen.
Ipinag-utos ni Court Administrator Jose Midas Marquez, na sagutin ni Perez and reklamo ni Austria sa loob ng 10 araw.
Maliban pa kay Perez, pinasasagot din ni Marquez sina Branch 87 Clerk of Court Maureen Genetiano-abaira at Court Sheriff George Batung sa reklamo ni Austria.