4 mag-uutol na terorista bulagta sa raid
MANILA, Philippines — Apat na mga magkakapatid na miyembro ng Dawlah Islamiyah terrorist group ang napaslang matapos na manlaban sa mga operatiba ng pulisya at militar na magsisilbi ng warrant of arrest laban sa kanila sa Sitio Malo, Jawe, Barangay Basag, T’boli, South Cotabato, kamakalawa.
Dead-on-the-spot sa operasyon ang binansagang “Macabangin Brothers” na sina Harudin, Norhan, Baharan at Moin Macabingin, pawang miyembro ng Dawlah Islamiyah (DI) “Maguid-Tadoy Group” sa ilalim ni alias “Tadoy”.
Sa ulat na nakarating kay Major General Juvymax Uy, ang commander ng Joint Task Force Central at 6th Infantry (Kampilan) Division, dakong alas-5 ng umaga ay magsisilbi lang sana ng warrant of arrest sa kasong murder ang mga operatiba ng 41st at 42nd Special Action Company ng PNP-SAF, 5th Special Forces Battalion sa ilalim ng 6th Infantry (Kampilan) Division, at T’Boli Municipal Police sa mga suspek na may kasong two counts ng murder, direct assault, at frustrated murder nang salubungin sila ng mga putok ng mga terorista.
Tumagal ng halos 20 minuto ang barilan hanggang sa napuruhan ng bala ang apat.
Nakuha mula sa mga suspek ang ilang mga armas gaya ng carbine, 2 kalibre .45 na baril, granada, tatlong cellphone, mga bala, cartridge ng iba’t ibang kalibre ng baril at marijuana.
Ayon kay PNP chief Debold Sinas, ang mga suspek na armado ng mga matataas na kalibre ay sangkot sa pambobomba sa General Santos City noong 2018 kung saan namatay ang dalawang pulis-Polomolok sa South Cotabato. - Doris Franche
- Latest
