5 drug suspek tiklo sa P100K shabu
SAN ANTONIO, Nueva Ecija, Philippines — Arestado ang limang lalaking drug suspects na kabilang sa top 9 sa provincial priority target list sa isang buy-bust operation sa kanilang drug den sa Purok 4 ng Barangay Buliran, kamakalawa ng hapon.
Kinilala ni Police Col. Marvin Joe Saro, Nueva Ecija Police provincial director, ang limang nahuling suspek na sina Danilo Manaluz, alyas Pats, 45,may-asawa, na Top 9 sa provincial priority target list; Resy Villegas, 30, binata at nasa watchlist ng San Antonio PNP; Ian Villegas, 37, binata, nakatatandang kapatid umano ni Resy; Jaymar Villegas, 25, binata; at Jeffrey Ocampo, 29, may-asawa; lahat ay pawang mga nakatira sa nasabing bayan.
Nabatid na bandang alas-3:30 ng hapon nang isagawa ang buy-bust operation ng pinagsanib na puwersa ng Philippine Drug Enforcement Agency – Nueva Ecija (PDEA-NE), PDEA Bataan Police Office, Nueva Ecija Police Office, at San Antonio Police Station.
Nakumpiska sa limang suspek ang 7 piraso ng plastic sachet ng umano’y naglalaman ng shabu na may estimated weight na 15 grams at halagang aabot sa P102,000, at ang P500-bill na “marked money”.
Nakatakdang sampahan ang mga suspek ng kasong paglabag sa article II ng Republic Act 9165 o Comprehensive Dangerous Drugs Act of 2002.
- Latest