30 food order dineliver sa iisang bahay sa Cebu

Dahil sa palpak na internet connection

MANILA, Philippines — Isinisi sa umano’y palpak na internet connection ang pagkasayang ng libu-libong pisong halaga ng pare-parehong order na pagkain ng isang bata matapos mai-deliver sa iisang address ng bahay sa Cebu City.

Batay sa ulat nitong Biyernes, umabot sa 30 food delivery riders ang nagsidatingan sa isang bahay­ sa Barangay Mabolo ng lungsod upang mag-deliver ng pare-parehong order na chicken fillet at French fries.

Napag-alaman na isang 7-anyos ang umorder at nagpa-deliver ng fries at chicken fillet mula sa isang fastfood chain. Ngunit dahil sa pagloloko ng koneksyon ng internet, hindi inakala ng bata na maraming beses na siyang nakapag-send ng kanyang transaction order.

Ayon sa ulat, aabot sa 40 na food riders ang nai-book ng bata, pero 30 lamang ang dumating sa lugar dahil na-cancel na ang ibang order nito.

Dahil sa insidente, naawa ang mga kaibigan ng mga driver o courier at binili na lamang nila ang ilang mga order.