Tattoo/photo shop pinasok: Higit P100K nakulimbat
CAVITE, Philippines — Aabot sa mahigit sa P100,000 na halaga ng mga kagamitan sa pagta-tattoo at pera ang natangay ng tatlong suspek matapos nilang pasukin at magnakawan ang isang tattoo/photo shop sa Brgy. Panapaan, Bacoor City kamakalawa ng hapon.
Sa imbestigasyon ni P/Cpl. Christian Jovita, alas-12:40 ng tanghali nang pasukin ng mga ‘di kilalang suspek ang Shutterink Tattoo and Photography Shop na nasa 2nd floor ng JS Building sa Km. 17 Aguinaldo Highway, Panapaan IV.
Sinira ng mga suspek ang door lock ng maindoor at dito dumaan papasok sa shop. Kinulimbat ng mga suspek ang may 20 piraso na mga tattoo machine na nasa P55,000 ang halaga, isang Cannon 600D camera na nagkakahalaga ng P20,000, isang pirasong Xiomiyi Action camera (P10,000 worth), isang Ipod touch (P2,500), isang Makita electric drill (P5,000), isang cable Extension cord (P1,000) at anim na cable wire (P5,000).
Tinangay din ng mga suspek ang pera sa kaha at iba pang mahahalagang gamit sa loob ng shop.
Nakilala naman ng isang empleyado rito na si Marvibelle Blanco, 30, ang diumano’y isa sa mga suspek na si Robert Japson alias Bert, 34-anyos na kasamang pinaghahanap ng pulisya.
- Latest
