Drug suspect kumasa sa parak, utas

NORTH COTABATO, Philippines — Hindi na umabot pa ng buhay sa pagamutan ang isang lalaking tulak droga makaraang manlaban sa isinagawang anti-illegal drug operation ng awtoridad sa Purok Mabuhay Barangay Marbel, bayan ng Matalam, dito, noong Martes ng madaling araw.

Sa report ng pulisya, nakilala ang nasawing suspek na si Celso Tauro, 32-anyos at nakatira sa nabanggit na lugar.

Batay sa imbestigas­yon, matapos umanong malaman na pulis ang katransakyon ng suspek ay agad bumunot ng armas at pinaputukan sa dahilan para gumanti ng putok ang mga otoridad na kanyang ikina­bulagta.

Naisugod pa sa ospital ang suspek pero ideneklarang patay ng sumuring doktor.