Binata pinabulagta sa harap ng bahay
LEGAZPI CITY, Albay , Philippines — Bulagta ang isang 34-anyos na binata sa matapos na barilin sa ulo ng suspek sa harap mismo ng kanilang bahay sa Purok Maligaya, Brgy. Poblacion, Mandaon, Masbate kamakalawa ng umaga.
Hindi na nagawa pang maisugod sa hospital at agad namatay ang biktimang si Vilmore Pusing Onilan, construction worker habang tinutugis na ang suspek na kinilalang si Amar Rubia Rubis, 45, pawang residente ng nasabing barangay.
Sa ulat, dakong alas-7 ng umaga habang nililinis ng biktima ang kanyang motorsiklo sa harapan ng kanilang bahay nang biglang sumulpot ang armadong suspek mula sa kanyang likuran. Bago pa nakakilos ang biktima ay walang kaabog-abog na siyang binaril nang malapitan sa ulo ng suspek na agaran nitong ikinamatay.
Nakuha ng mga rumespondeng pulis sa crime scene ang isang basyo ng bala ng kalibre 45 baril habang sinisiyasat pa ang motibo sa pamamaril.
- Latest