13-anyos hinalay, pinatay saka itinapon sa sapa
Pinasok sa bahay habang naiwang mag-isa
TUGUEGARAO CITY, Cagayan, Philippines — Kalunus-lunos ang sinapit ng isang 13-anyos na dalagita na pinaniniwalaang hinalay muAa bago sinakal hanggang sa mamatay saka itinapon sa sapa sa Barangay Bella Luz, San Mateo, Isabela kamakalawa.
Sinabi ni Major Darwin Urani, hepe ng San Mateo Police Station na dakong alas-10:00 ng umaga nang matagpuan ng mga mamamayan ang bangkay ni Princess Diane Corpuz, Grade 8 student, na nakalutang sa tubig at wala nang pang-ibabang saplot.
Nabatid na naiwang mag-isa sa kanilang bahay ang biktima matapos na umalis ang kanyang kuya para isugod ang misis nito sa ospital noong gabi ng Lunes.
Teorya ng mga imbestigador, pinasok ng ‘di kilalang salarin sa loob ng bahay ang dalagita at doon hinalay saka pinatay sa sakal nang magtangkang manlaban. May mga indikasyon din na binuhat ng salarin ang bangkay ng dalagita patungo sa sapa na may 200 metro ang layo sa bahay nito saka itinapon upang pagtakpan ang krimen,
Masusi pang sinusuri ng SOCO ang loob ng bahay ng dalagita na umano’y may mga bakas ng panlalaban upang makakalap ng ebidensiya gaya ng buhok o fingerprint upang matukoy ang rapist-killer.
- Latest