2 karnaper/kidnaper todas sa shootout vs PNP-AKG
MANILA, Philippines — Dalawang sinasabing karnaper na sangkot din sa iba’t ibang kriminal na aktibidades kabilang ang mga kaso ng pagdukot ang bumulagta nang makaengkwentro ng mga operatiba ng Philippine National Police-Anti-Kidnapping Group (PNP-AKG) sa isang buy-bust operation sa Pililia, Rizal kahapon ng madaling araw.
Kinilala ni PNP-AKG Luzon field commander Col. Villaflor Bannawagan ang isa sa mga napatay na si Jake Pingal, habang inaalam pa ang pagkakakilanlan ng isa pang suspek.
Tinutugis naman ng mga pulis ang lider umano ng mga nasawi na si Ryan Dele Cruz alyas “Mokong” na may warrant of arrest sa kasong kidnapping.
Sa ulat, dakong alas-3:00 ng madaling araw nang maganap ang engkuwentro sa pagitan ng mga suspek at PNP-AKG sa Sitio Kawayan farm ng Brgy. Halayhayin sa Pililia.
Nabatid na sa kasagsagan ng buy-bust operation ay nakatunog ang mga suspek na mga alagad ng batas ang kanilang ‘kliyente’ kaya kanilang pinaputukan sanhi ng engkuwentro.
Nabatid na bukod sa pagiging karnaper at kidnaper, sangkot din ang mga suspek sa gunrunning, robbery hold-up at gun-for-hire.
Narekober sa encounter site ang limang piraso ng kalibre .45 na baril, at isang unit ng hinihinalang nakaw na motorsiklo.
- Latest
