Mister na nagkakabit ng internet nahulog, tigok
SANTIAGO CITY, Isabela, Philippines — Patay ang isang mister matapos na aksidenteng mahulog habang nagkakabit ng linya ng internet sa Barangay Tuguegarao, Echague sa lalawigang ito kamakalawa ng tanghali.
Kinilala ang nasawing biktima na si Manuel Espiritu Jr., 38, isang private internet provider at residente ng Brgy. Malitao sa nabanggit na bayan.
Napag-alaman na umakyat sa mataas na bahagi ng poste ang biktima para sa ikakabit na internet line nang aksidenteng maputol ang tubo na kinakapitan nito na naging dahilan para mahulog at tuluy-tuloy na bumagsak sa lupa dakong alas-12:30 ng tanghali.
Agad na isinugod sa pinakamalapit na pagamutan ang biktima subalit idineklarang dead-on-arrival dahil sa matinding pinsala sa ulo kung saan lumabas pa umano ang dugo sa kanyang tenga at ilong.
Napag-alaman na ang pagkasawi ng biktima ay kasabay ng kaarawan ng kanyang nag-iisang anak habang ang kanyang asawa naman ay nasa ibang bansa.
- Latest