Lady judge niratrat ng tandem, aide malubha
LEGAZPI CITY, Albay, Philippines — Masuwerteng hindi tinamaan ng bala at konting galos lang ang tinamo ng isang babaeng huwes habang malubhang nasugatan ang kanyang aide matapos silang tambangan at pagbabarilin ng riding- in-tandem habang binabagtas ang kahabaan ng Maharlika National Highway sa Brgy. Puro Batia, Libmanan, Camarines Sur kamakalawa ng hapon.
Konting galos sa braso ang tinamo ng biktima na kinilalang si Jeaneth Gaminde San Joaquin, presiding judge ng Regional Trial Court Branch 56 sa Libmanan, may-asawa at residente ng San Juan St., Brgy. Tinago, Naga City.
Maselan naman ang kalagayan sa ospital matapos tamaan ng bala sa itaas na bahagi ng katawan ang tauhan ni Judge San Joaquin na si Rocelle Martinez, 34-anyos, residente ng bayan ng Buhi.
Sa ulat, dakong alas-2:30 ng hapon, sakay ng pick-up truck na may plakang EAA-8731 si Judge San Joaquin at kanyang aide at binabagtas nila ang highway pauwi ng Naga City nang bigla silang pagbabarilin ng dalawang gunmen na lulan ng hindi naplakahang motorsiklo. Hindi napuruhan ang huwes dahil siya ang nagmamaneho ng sasakyan at posibleng inakala ng mga suspek na siya ang nakaupo sa tabi ng driver na pinuntirya ng gunman.
Matapos ang pamamaril, tumakas ang mga suspek patungo sa hindi malamang direksyon habang agad na rumesponde ang mga residente at pulis kaya naisugod ang mga biktima sa ospital.
Nakuha ng mga pulis sa crime scene ang pitong basyo ng bala ng hindi pa malamang kalibre ng baril.
Isa sa anggulong tinututukan ay ang may kaugnayan sa hinahawakang kaso ng biktima na pinaniniwalaang target ng mga salarin.
- Latest