3 brgy. sa Cagayan ‘di madaanan sa landslide
MANILA, Philippines — Tatlong barangay sa lalawigan ng Cagayan ang hindi madaanan matapos ang mga pagguho ng lupa habang isang bahay ang nawasak bunsod ng walang humpay na pagbuhos ng ulan sanhi ng masungit na panahon.
Ayon kay Michael Conag ng Office of the Civil Defense (OCD)-Region 2, ang mga naapektuhan sa pagguho ay ang Barangay Dalin, Brgy. Dalla at Brgy. Asinga sa bayan ng Baggao kung saan isang bahay ang nasira.
Nasa maayos na kalagayan naman ang dalawang residente ng Brgy. Asinga dahil agad nakapagsagawa ng pre-emptive evacuation ang mga opisyal ng Local Government Unit (LGU)-Baggao bago ang pagguho ng lupa.
Bunga nito, hindi pa rin madaanan ang ilang tulay kasama na ang Bagunot overflow bridge sa Baggao.
Samantala sa Isabela, naapektuhan din sa landslide at flashflood ang Cabagan-Santa Maria overflow bridge at Alicaocao bridge sa Isabela maging ang Pinacanauan national Tuguegarao Road sa Tuguegarao City.
Kaugnay nito, pinayuhan ang mga motorista na iwasan munang dumaan sa mga nabanggit na tulay at kalsada para makaiwas sa anumang insidente o disgrasya dahil sa patuloy na pag-apaw ng tubig at pagguho ng lupa sa ibang lugar.
- Latest
