2 ilog umapaw: 13 barangay sa Lucena lumubog
LUCENA CITY, Philippines — Nasa 13 barangay sa lungsod na ito ang lumubog sa tubig-baha at tinatayang may 1,662 pamilya ang inilikas at nagsisiksikan ngayon sa iba’t ibang evacuation centers makaraang umapaw ang dalawang ilog bunsod ng walang puknat na pagbuhos ng ulan kahapon ng madaling araw.
Kabilang sa mga pinalubog ng tubig-baha ay ang mga Barangay 1, 4, 5, 6, 7, 8, 9, 10, 11, na pawang nasa city proper at ang mga barangay na nasa tabi ng ilog ng Dumacaa at Iyam na Market View, Cotta, Ibabang Dupay at Ibabang Iyam.
Ayon kay Gng. Janet Gendrano, chief executive officer ng Lucena Disaster Risk Reduction and Management Office (LDRRMO ), alas-2:00 ng madaling araw nang biglang tumaas ang tubig sa dalawang ilog at umapaw habang kasagsagan ng sunud-sunod at malalakas na buhos ng ulan.
Mabilis na pumasok ang tubig baha sa mga kabahayan gayunman ay maagap namang nagtungo sa matataas na lugar ang mga residente partikular ang mga naninirahang malapit sa Dumacaa at Iyam River, habang ang iba ay mabilis na pumunta sa mga barangay hall na ginawang evacuation centers.
Maagap namang nagbigay ng mga relief goods at mga pangunahing pangangailangan ng mga evacuees ang City Government sa pamumuno ni Mayor Roderick Alcala.
- Latest