Mayor ng Dasmariñas City tinamaan ng virus

CAVITE , Philippines —  Tinamaan na rin ng coronavirus disease (COVID-19) ang alkalde ng Dasmarinas City na si Jenny Austria Barzaga.

Sa kanyang Facebook page, inanunsyo ni Mayor Barzaga ang malungkot na balita na nagpositibo siya sa COVID-19 at kasalukuyan nang naka-isolate.

Nabatid na Setyembre 28 ng gabi nang itinawag kay Bargaza na positibo siya sa virus matapos siyang isalang sa swab test kasama ang lahat ng empleyado ng City Hall. Ilang empleyado rin ang nagpositbo sa nasabing sakit na kasalukuyang nang naka-quarantine.

Nakaramdan umano ng pananakit ng katawan ang alkalde hanggang sa lagnatin. Nagkaubo rin siya at nawalan ng ganang kumain kaya nagpa-COVID test. Ma­kalipas ang isang araw ay lumabas ang resulta na positibo ang alkalde sa COVID-19.

Nauna rito, nagbaba ng kautusan ang mayora na pansamantalang isara ang City Hall dahil karamihan sa mga empleyado ay nakitaan ng mga sintomas ng COVID-19 at kinakailangan i-swab test kasama na rin siya.