‘Drug queen’ sa Baguio, 5 pa timbog
TUGUEGARAO CITY, Cagayan, Philippines — Nadakip na ng awtoridad ang tinaguriang “drug queen” sa Baguio City kasama ang lima pang parokyanong bumabatak sa loob ng kanyang tiangge kasunod ng ikinasang buy-bust operation sa Brgy. Central Fairview sa lungsod kahapon.
Kinilala ang naaresto na si Analyn Lee na umano’y suki ng mga kabataang adik sa Baguio City.
Ayon sa report, habang isinasagawa ni Lee ang transaksyon sa mga undercover agents, limang parokyano ni Lee ang nagsimulang magsagawa ng “pot session” sa loob kung kaya’t naglantaran na ang mga operatiba at sila ay inaresto.
Ang mga natiklo sa sesyon ay sina Jeanne Tabil, 19, ng La Trinidad, Benguet; John Michael Abalos, 22, ng Santa Barbara, Pangasinan; Rodel Balmores, 19, na taga-Cauayan City, Isabela; Mark Anthony Reyes, 19, taga-San Manuel, Tarlac, at Sherilyn Viray, 18, ng Baguio City.
Nasamsam sa tiangge ang shabu na nagkakahalaga ng P5,000 at sari-saring drug paraphernalia.
- Latest