30 manok na panabong tinangay sa farm, kawatan nalambat

TIAONG, Quezon , Philippines — Arestado ang isang tindero ng gulay habang nakatakas ang kasamahan nito makaraang ireklamo ng pagnanakaw ng 30 na sasabunging manok na nagkakahalaga ng mahigit sa P.2 milyon sa isang farm sa Sitio Gulod, Brgy. Aquino, dito kamakalawa ng madaling araw.

Kinasuhan ng theft ang suspek na si Jay-Ar Dominguez, 27, may asawa habang tinutugis ng pulisya ang kasama nitong si alyas “Joel Llaga”.

Sa ulat ng pulisya, pinasok ng dalawang suspek dakong alas-12:30 ng madaling araw ang CT Farm na pag-aari ng negosyanteng si Cezar Tolentino ng Brgy. Poblacion at agad nilang nilimas ang umano’y nasa 30 sasabunging manok na nagkakahalaga ng P240,000.

Sa followup operation, nahuli si Dominguez habang nakatakas ang kasama at tatlong manok na lamang ang nabawi sa lugar.