Mayor ng Ilagan City, misis at anak positibo sa COVID-19
TUGUEGARAO CITY, Cagayan, Philippines — Nagpositibo sa COVID-19 ang mayor ng Ilagan City sa lalawigang ito pati na ang misis at anak nito sanhi upang isailalim ang kanyang lungsod sa enhanced community quarantine (ECQ) mula kahapon hanggang sa Agosto 12.
Sinabi ni Mayor Josemarie Diaz na posibleng nakuha nilang mag-anak ang virus sa paglilingkod sa mga mamamayan sa lungsod sa gitna ng nararanasang pandemya.
Nagpositibo ang misis nitong si Evelyn Diaz na Sectoral Representative sa Konseho at anak nitong Konsehal na si Jayvee Diaz.
Inamin naman ni Diaz na nangangamba siya sa insidente ng local transmission sa lungsod gaya ng pagkakahawa kamakalawa ng tatlo pang kababayan sa isang virus carrier sa katabing bayan ng Gamu.
Inihayag din ni Diaz ang pangamba sa mga kababayan na kanyang nakadaupang palad at mga kawani sa City Hall na kasama sa trabaho na maaring nahawa sa virus kaya’t isinailalim niya sa lockdown ang City Hall para dumaan sa disinfection.
- Latest