Mag-utol na NPA officer sumuko
SANTIAGO CITY, Isabela , Philippines — Sumuko ang mag-utol na kapwa medical officer ng mga rebeldeng New People’s Army (NPA) sa Nueva Vizcaya, ayon sa ulat kahapon.
Kinilala ni P/Col. Richard Saavedra, provincial police director ng Nueva Vizcaya ang dalawang sumukong rebelde sa mga alyas na “Ka Cain”, 28, at “Ka Abel”, 25, na kapwa taga-Villaverde sa nabanggit na lalawigan.
Ayon kay Abel, medical officer at miyembro ng Team Dos, Squad Dos Platoon Dos of Danilo Ben Command ng Komiteng Larangan ng West Cagayan, hinikayat siyang pumasok noong 2014 matapos makilahok sa isang rally sa Manila.
Si Cain ay pumasok naman noong 2015 na ang tanging pakay ay para hanapin sana ang kanilang mga magulang at isa pang kapatid na sumapi rin sa nasabing kilusan. Lingid sa kaalaman nito, nauna na palang pumasok ang nakababatang kapatid na si Abel na sa buong akala niya ay nasa Manila lamang na nagtatrabaho.
Sinabi ni Cain na sa loob ng limang taon sa kilusan, hindi niya nakita o natagpuan ang mga magulang, isa pang kapatid at maging ang utol na si Abel.
Ayon kay P/Lt. Col. Samson Kimayong, pinuno ng Provincial Mobile Force Company, unang sumuko sa pulisya si Cain at sa loob ng maraming taon na hindi pagkikita ay muling nagtagpo ang magkapatid nitong Hulyo 29 nang sumunod na sumuko si Abel.
Sinabi ni Nueva Vizcaya Vice Gov. Jose Tomas Sr., na tutulungan niya ang dalawang rebel returnees para maipagpatuloy ang kanilang pagbabagong buhay.
- Latest