4 high ranking official ng NPA nalambat

MANILA, Philippines — Nalambat ng mga awtoridad ang apat na high ranking officials ng New People’s Army (NPA) sa operasyon sa Purok Mapuso, Brgy. Magballo, Kabankalan City , Negros Occidental nitong Biyernes ng gabi.

Kinilala ni Captain Leon Pancito III, Spokesman ng Army’s 3rd Infantry Division (D) ang mga nasakoteng opisyal ng NPA na sina Emmylo Cañares alyas Ka Sid/Drey, 38, Kalihim ng Second National Urban Center Party Committee (2NUCP) at dati ring Finance Officer ng Bohol Party Committee; George Buga-a alyas Ka Samantha/Alexa, 42, Finance Logistic Officer ng Regional Strike Forces ng Kilusang Rehiyon Negros at dati ring Secretary General ng Pamalakaya Negros.

Ang dalawang iba pa ay sina Relyn Moreno alyas Sam, 22, Regional Communication Staff ng Kilusang Rehiyon Negros at Raffy Patajo alyas Paolo, 21, Squad Leader ng Platoon 2, South West Front at Regional Communication Staff ng Kilusang Rehiyon Staff.

Sinabi ni Pancito na ang mga rebelde ay nasakote ng pinagsanib na mga elemento ng tropa ng Army’s 15th Infantry Brigade at Police Regional Office (PRO) 6 sa nasabing lugar nitong Biyernes ng gabi.

Sinabi naman ni Police Lt. Col. Gilbert Gorero, Spokesman ng PRO 6, nakumpiska sa mga inarestong opisyal ng NPA ang isang cal 45 pistol, isang cal 38 pistol na may limang mga bala, apat na hand grenade , P 24,000 cash, sari-saring mga cellphones, USBs , mga subersibong dokumento, medical supplies  at mga personal na kagamitan.