PMA cadets, officials pinaaaresto sa Dormitorio hazing slay
MANILA, Philippines — Pinaaaresto na ng korte sa Baguio City ang mga kadete at opisyal ng Philippine Military Academy (PMA) dahil sa pagkamatay ni Cadet Fourth Class Darwin Dormitorio noong 2019.
Inilabas ni Presiding Judge Maria Ligaya Itliong-Rivera ang unang warrant of arrest laban kay Julius Carlo Tadena dahil sa paglabag sa R.A. 11053 o ang Anti-Hazing Law. Nag-isyu rin siya ng warrant of arrest laban naman kina dating PMA Cadets Third Class Shalimar Imperial, Jr. at Felix Lumbag Jr.
Una nang kinasuhan ng murder sa Baguio City Prosecutor’s Office sina Imperial at Lumbag. Ang dalawa ang sinasabing nang-torture at nang-harass kay Dormitorio ng ilang buwan na naging dahilan ng pagkamatay ng huli noong Setyembre 17, 2019.
Sina Tadena, Imperial at Lumbag ay kinasuhan ng paglabag sa Anti-Hazing Law at walang inirekomendang piyansa ang korte sa tatlo.
Bukod sa tatlong kadete, pinaaaresto rin ng korte ang mga PMA doctors na sina Captain Flor Apple Apostol ng Fort del Pilar Station Hospital, Major Maria Ofelia Beloy at Lieutenant Colonel Ceasar Candelaria. Sila ay kinasuhan naman ng “murder due to negligence” at nagtakda ang korte ng P200,000 piyansa bawat isa sa kanila.
Matatandaang nasawi si Dormitorio sa loob ng PMA barracks matapos makaranas ng pambubugbog. Na-confine siya sa ospital ng dalawang beses at napag-alamang nagtamo ng mga pasa sa tiyan dahil sa hazing.
- Latest