Mister sinibak sa leeg ng 15-anyos pamangkin, patay
LEGAZPI CITY, Albay, Philippines -- Karumal-dumal na kamatayan ang sinapit ng isang 41-anyos na mister matapos na pagtatagain ng kanyang 15- anyos na pamangkin sa leeg habang nakahiga sa upuang kawayan sa bahay ng isa nilang kamag-anak sa Brgy. Magapo sa Tabaco City kamakalawa ng gabi.
Agad nasawi dahil sa malalim na taga sa leeg ang biktimang kinilalang si Randy Biong Urbistondo, magsasaka at residente ng Brgy. Bonot.
Sumuko naman sa mga pulis at hawak na ng City Social Welfare ang suspek na kinilala lamang sa pangalang “Tope”, Grade 8 at residente ng nasabing barangay.
Sa ulat, dumalaw sa kanyang mga kapatid at mga kaanak sa naturang barangay ang biktima at nagkaroon ng masayang inuman.
Gayunman, dakong alas-9:50 ng gabi nang malasing ay nahiga sa kawayang upuan ang biktima pero nang nakita ang pamangkin ay pinagsalitaan umano niya ng masasakit kaya sa galit ng binatilyo ay kumuha ng itak.
Hindi na nagawa pang makabangon o makapanlaban ang biktima nang bigla siyang pagtatagain sa leeg ng pamangkin dahilan ng kanyang agarang kamatayan.
- Latest