Parak inutas ng rider sa checkpoint, 3 pa sugatan
SULTAN KUDARAT , Philippines — Patay ang isang pulis nang barilin sa ulo ng isang rider na kanyang sinita sa quarantine checkpoint habang nasugatan din ang tatlong kasamahan nito kabilang ang isang barangay health worker (BHW) sa Purok Malipayon, Brgy. Poblacion, Esperanza, Sultan Kudarat kamakalawa.
Kinilala ang nasawing pulis na si P/Executive Master Sergeant Wilson Paclibar, nakatalaga sa Esperanza Municipal Police Station at nagbabantay sa quarantine checkpoint habang ang mga sugatan ay sina P/SSg Chato Maycong, Josephine Danggan, BHW at isang Mr. Saldo alyas Lanto na isang tanod ng Barangay Poblacion.
Sa inisyal na imbestigasyon, alas-11:00 ng umaga habang nagbabantay sa quarantine checkpoint ay hinarang ni Paclibar ang ‘di kilalang suspek na lulan ng motorsiklo at hinanapan ng rehistro ng motor at driver’s license ngunit habang binubusisi nito ang ibinigay na papeles ay bigla na lamang bumunot ng cal. 45 na baril ang suspek at binaril sa ulo ang pulis na agad namatay.
Pinagbabaril din ng suspek sina Maycong, Danggan at Saldo na nagtamo ng sugat sa kamay at braso.
Nagpapatuloy ang manhunt operation ng pulisya laban sa suspek na mabilis na tumakas.
- Latest