4 BIFF todas, 6 sugatan sa engkuwentro
Maguindanao, Philippines — Apat na mga miyembro ng Bangsamoro Islamic Freedom Fighters (BIFF) ang nasawi at anim ang nasugatan sa nangyaring shootout sa checkoint ng Barangay Timbangan, Sharif Aguak, Maguindanao, kamakalawa ng alas-2:00 ng hapon.
Nakilala ang mga napatay na sina Rahib Lumenda Esmail, Prati Kuludan, Arsad Ukom Utto at Aliofmer Talimbu, mga tauhan umano ni Kumander Ustadz Karialan ilalim ng Karialan faction ng Bangsamoro Islamic Freedom Fighters (BIFF).
Ayon kay Maguindanao Police Provincial Director Colonel Arnold Santiago, sakay umano ang mga suspek ng isang Suzuki multicab na may plakang MAK- 9062 sa Brgy. Timbangan Sharif Aguak Maguindanao pagsapit sa PNP Checkpoint ay hinarang sila ng mga pulis at tinanong kung bakit may mga dala silang mga armas.
Nagpakilala ang mga suspek na mga tauhan ni Maguindanao Provincial Drug Enforcement Unit (PDEU) Chief, Major Edwin Tabora.
Dahil hindi naka-uniporme, hinanapan ng ID at dokumento ang apat sa kanilang dalang mga armas, subalit biglang namaril ang ilan sa mga suspek.
Dito na nakasagupa ng mga sundalo ang tinatayang 30 mga myembro ng BIFF na tumagal ng isang oras ang palitan ng putok sa magkabilang panig na kung saan apat ang tinamaan habang sugatan naman ang anim pa ayon naman sa mga sibilyan na lumikas sa kasagsagan ng engkuwentro.
Umatras ang mga rebelde patungong Liguasan Marsh nang paputukan sila ng militar gamit ang 105mm howitzers cannon.
Naisugod pa ang apat sa Maguindanao Provincial Hospital ngunit hindi na naisalba pa ng mga doktor dahil na rin sa mga tinamong tama ng bala sa iba’t ibang parte ng kanilang katawan.
Pinabulaanan naman ni Major Tabora tauhan niya ang mga suspek na miyembro umano ng BIFF na sangkot sa illegal drug trade sa Maguindanao.
Narekober sa mga nasawi ang apat na mga matataas na uri ng armas, mga bala, mga magazine at pampasabog.
Sa ngayon ay pinaigting pa ng militar at pulisya ang pagbabantay sa lalawigan ng Maguindanao laban sa mga armadong grupo.
- Latest
