Chief tanod, 4 pa huli sa tupada

‘Di sumunod sa ‘social distancing’

CAVITE, Philippines — Sa kabila ng umiiral na home qua-rantine at social distancing dahil sa COVID-19, lima katao kabilang ang isang hepe ng mga tanod ang inaresto matapos magpasimuno at magtipun-tipon sa illegal na tupada sa bayan ng Rosario, dito sa lalawigan kahapon ng umaga.  

Kasong paglabag sa PD 1602 o Illegal Gambling (Tupada) ang isinampa laban kina Josefino Prudente, 61, chief tanod ng Brgy. Wawa 2, Rosario, Cavite; Erlindo Albuera, 60, ng Brgy Wawa 1; Joey Villarin, 32, ng Brgy. Wawa 2; Henry Sagpao, 49, ng Brgy. Wawa 1 at Dominador Versosa, 51, ng Brgy Wawa 1; pawang sa Rosario.

Sa ulat ni P/SSgt Donatilla Quintos ng Rosario Municipal Police Station, dakong alas-11:30 ng umaga nang magsagawa ng operasyon laban sa illegal gambling ang Rosario Police sa Brgy. Wawa kung saan naaktuhan ang mga suspek habang nagsasabong. Narekober sa mga inaresto ang 12 na panabong na manok, tari at cash.