3 bata patay sa sunog
Nakulong sa nakakandadong bahay
MANILA, Philippines — Tatlong bata ang nasawi makaraang aksidenteng makulong ng apoy sa loob ng nasusunog nilang tahanan sa Brgy. Camanga, Dumalinao, Zamboanga del Sur Huwebes ng umaga.
Dakong alas-9 ng umaga nang mangyari ang insidente sa Purok Talaba, Brgy. Camanga, Dumalinao ng lalawigang ito.
Ang nasawing mga biktima ay kinabibilangan ng isang 8-anyos na batang babae at dalawa nitong kapatid na may edad 4 at 3 taong gulang.
Ang nasunog na tahanan, ay pag-aari nina Bimbo Bitzusa at Maritess Bitzusa na naiwan ang mga anak na walang kasama.
Sa pahayag ng kapitbahay ng mga biktima, nagulantang na lamang sila ng makitang nilalamon ng apoy ang tahanan ng mag-asawang Bitzusa kung saan nakapad-lock sa loob nito ang mga bata.
Nabigo namang mailigtas ang mga bata dahilan nababalutan na ng apoy ang buong kabahayan.
Sinabi ni Fire Inspector Dionisio Cayudong na naapula ang sunog bandang alas-9:37 ng umaga.
Isinasailalim pa sa masusing imbestigasyon ang kasong ito upang matukoy ang pinagmulan ng sunog.
- Latest