Wildfire sa Mt. Pulag muling sumiklab
TUGUEGARAO CITY, Cagayan, Philippines — Bagama’t naapula ng ulan ang forest fire sa pamosong Mt. Pulag noong Linggo; muli na namang sumiklab dito ang apoy sa bahagi ng Brgy. Duacan sa Kabayan, Benguet nitong Martes hanggang kahapon.
Ayon kay Fire Officer 1 Edilberto Naisod Jr. ng Kabayan Bureau of Fire Protection, nag-umpisang lumagablab ang apoy dakong alas-3:30 ng hapon, isang araw matapos maapula ng ulan ang sunog sa karatig na Brgy. Eddet noong Linggo.
Ayon kay Naisod, manu-manong nagtutulungan ang mga kagawad ng BFP, pulisya at mamamayan na maapula ang sunog sapagkat hindi makapasok ang kanilang mga firetrucks sa lugar. Gayunman, sinabi na Naisod na papalayo na sa direksyon ng Mt. Pulag ang sunog.
Kasabay ng sunog sa Duacan ang wildfire sa Brgy. Madaymen sa karatig bayan ng Kibungan na pilit na inaapula pa rin ng mga awtoridad at mamamayan habang isinusulat ang report na ito.
- Latest