Mister inutas sa bar

RIZAL, Philippines — Bulagta ang isang lalaki nang pagbabarilin ng nag-iisang gunman habang nakaupo sa harapan ng isang KTV bar sa Antipolo City kamakalawa ng gabi. Ang biktima ay nakilala lang na si Edgar Bustamante, nasa hustong gulang, habang nakatakas ang nag-iisang suspek na hindi pa nakikilala ng mga awtoridad dahil nakasuot ito ng maskara nang isagawa ang krimen. Sa ulat ng Antipolo Police, dakong alas-9:30 ng gabi nang maganap ang krimen sa harapan ng Playgirl KTV Bar sa Sumulong Highway, Brgy. Mayamot. Nakaupo lamang ang biktima sa harapan ng naturang bar, katabi ang isang testigo nang bigla na lang dumating ang suspek at kaagad na pinagbabaril ang una sa iba’t ibang bahagi ng katawan.Nang matiyak na napuruhan ang target ay tumakas na ang maskaradong suspek.