Parak itinumba sa loob ng bus
3 gunmen nagpanggap na pasahero
ZAMBOANGA DEL NORTE, Philippines — Pinagbabaril hanggang sa mapatay ang isang pulis sa loob ng isang pampasaherong bus ng tatlong lalaki na nagkunwaring mga pasahero habang bumabagtas sa kahabaan ng highway ng Brgy. Mamawan, Baliguian, Zamboanga del Norte nitong Biyernes ng hapon.
Kinilala ang nasawing biktima na si P/Master Sergeant Chito Lagahit Jr., aktibong kasapi ng Baliguian Municipal Police Station. Siya ay idineklarang dead-on-arrival sa Siocon District Hospital sa tinamong mga tama ng bala sa iba’t ibang bahagi ng katawan.
Sinabi ni Police Major Helen Galvez, spokesperson ng Police Regional Office (PRO) 9, na nangyari ang pamamaslang sa biktima sa loob ng SJG Bus Liner habang tumatakbo ang behikulo sa highway ng Sitio Quarry, Brgy. Mamawan, Baliguian dakong alas-5:45 ng hapon.
Nauna rito, lumalabas sa imbestigasyon na sumakay ang tatlong suspek sa nasabing bus galing Dipolog City patungo sa Baliguian at tinabihan ang biktima sa upuan. Pagsapit sa nasabing lugar, agad na siyang pinagbabaril ng mga suspek.
Nagsigawan sa takot ang mga pasahero at ilang saglit pa ay nagsibaba na ang mga suspek na pinaputukan pa ang windshield sa harapan ng bus malapit sa may driver.
- Latest
