Miyembro ng Abu Sayyaf na may kasong murder, naaresto
MANILA, Philippines — Naaresto ng mga otoridad ang isang mi-yembro ng Abu Sayyaf Group (ASG) na sangkot sa pagpatay noong nakalipas na linggo kay Police Lt. Sali Salim sa isinagawang follow-up operation sa pier ng Zamboanga City, nitong Biyernes ng umaga.
Ang nasakoteng suspek ay si Benhajar Salapuddin Alan, nasa hustong gulang, residente ng Sta. Barbara sa lungsod ng Zamboanga.
Sa ulat, dakong alas-5:00 ng umaga nang maaresto si Alan sa bisa ng warrant of arrest na inisyu ni Judge Catherine Fabian, ng Regional Trial Court (RTC) Branch 16, 9th Judicial Region, Zamboanga City sa kasong “murder qualified by treachery”, sa Zamboanga Port Authority Compound, Zamboanga City.
Si Alan ay sangkot sa pagpatay kay Police Lt. Sali Salim, team leader ng Provincial Drug Enforcement Unit ng Sulu Police noong Enero 12, 2020.
Ang suspek ay itinuturo ring pangunahing salarin sa pagpatay sa isang Joemer Hashim Jawadin noong Disyembre 7, 2015 sa nasabi ring lungsod.
Sa tala, ang suspek ay miyembro ng Abu Sayyaf Group (ASG) sa Sulu na pinamumunuan ng napatay na Abu Say-yaf senior leader Albader Parad, at sangkot sa kidnapping-for-ransom, gun-for-hire at illegal drug activities.
Patuloy namang isinasailalim sa masusing tactical interrogation ang nasakoteng Abu Sayyaf member.
- Latest