Motorsiklo tinaniman ng bomba
MANILA,Philippines — Isang improvised explosive device (IED) na itinanim sa isang motorsiklo sa Barangay Mother Poblacion, Shariff Aguak, Maguindanao ang sumabog kahapon ng umaga.
Sa ulat mula kay P/Maj Alexander Butuan, hepe ng Shariff Aguak Police, bandang alas-10:50 ng umaga nang sumabog ang bomba sa loob ng motorsiklo na ipinarada sa naturang lugar.
Sakto naman na dumaan sa lugar ang isang unit ng Toyota Hilux na may plate number NEB 4056 nang sumabog ang bomba.
Masuwerte namang nakaligtas ang mga sakay ng pick up na sina Jeanor Lintang (driver), Arsad Lin-tang, Jumer Mamasapano, Norudin A. Sansaluna, at isang Johamirin Sansaluna.
Inaalam pa sa ngayon ng pulisya kung totoo ang nakalap na impormasyon na sakay diumano ng Hilux pick up ang target ng pagpapasabog.
Nagpapatuloy naman sa ngayon ang isinasagawang imbestigasyon at post blast investigation ng Explosive Ordinance Division Team ng pulisya at military sa lugar.
- Latest
