Umawat sa away, tinadtad ng 3 kalaklakan

LOPEZ, Quezon, Philippines — Naging mitsa ng kamatayan ng isang obrero ang pag-awat nito sa mga kainuman makaraang pagtulungang tagain ng isang magkapatid at isa pa sa Barangay Concepcion ng bayang ito kamakalawa ng gabi. Halos maputol ang leeg at kamay ng biktimang si Raymundo Malaca, 30-anyos, samantalang tinutugis na ng pulisya ang magkapatid na suspek na sina Jonas at Glenn Santa Cruz at isang Dave Nunez. 

Ayon sa pulisya, huling nakita ang mga suspek at biktima na nag-iinuman dakong alas-7:10 ng gabi at nang malasing na ay naungkat ang tungkol sa nililigawan nilang babae. 

Napigilan ng biktima ang dapat sana’y pagsusuntukan ng mga kalaklakan hanggang sa mag-uwian na patungo sa kani-kanilang mga bahay. Gayunman, dakong alas-7:20 ng gabi ay muling bumalik ang mga suspek at pinagtataga ang nasorpresang biktima.