Amok: Mag-utol kinatay ng pinsan
TUGUEGARAO CITY, Cagayan, Philippines — Patay ang magkapatid na lalaki matapos na ataduhin ng itak ng kanilang nag-amok na pinsan kasunod ng mainit na pagtatalo sa kanilang masaya sanang laklakan sa Brgy. Capagaran, Allacapan, Cagayan noong Sabado.
Kinilala ni P/Corporal Ariel Beltran ang mga napatay na sina Roland Cabiles, 36-anyos at kapatid na si Moises, 42, habang ang suspek ay si Ricky Tabalansa, 40, na pawang magkakapitbahay.
Ayon kay Beltran, sumiklab ang pagtatalo nina Moises at Tabalansa nang ungkatin ng una ang personal at masalimuot na relasyong mag-asawa ng huli kaya nauwi ang kanilang inuman sa pagpapaalam ng mag-utol dakong alas-9:50 ng gabi.
Sa kabila nito, galit na kinuha ni Tabalansa sa loob ng bahay ang bagong hasa niyang itak saka pinatay ang ilaw bago pinagtataga si Moises saka hinabol si Roland.
Ayon kay Beltran, pinagtataga rin ni Tabalansa si Roland subalit nagawang agawin nito ang itak at ginantihan ng taga ang una bago nawalan ng ulirat at tuluyang namatay.
Sa ngayon ay inoobserbahan si Tabalansa sa Cagayan Valley Medical Center dito matapos ilipat mula sa Toran District Hospital sa Aparri.
- Latest