2 NPA todas sa engkuwentro
RIZAL, Nueva Ecija, Philippines — Dalawang hinihinalang miyembro ng rebeldeng New People’s Army (NPA) ang napatay ng mga sundalo ng Philippine Army (PA) sa isang engkuwentro sa Purok Buldozer, Brgy. Estrella ng bayang ito no-ong Huwebes ng hapon.
Kinilala ang dala-wang napatay na sina Michael Pagkaliwanagan alyas “Allan Ladesma” at isang alyas “Miguel”.
Sugatan naman ang apat pang rebelde na sina Lisel Labo, alyas “Nido”, isang amasona; Carlos Aguilar alyas “Badong”; Danilo Sagun, at isa pa umanong amasona na si Redsa Balatan alyas “Sining”. Arestado pa ang isa pa na si Ernesto Quimzon, 42, ng Brgy. Vega, Bongabon, Nueva Ecija.
Ayon sa Rizal Police, nagkaroon ng sagupaan sa pagitan ng tropa ng 84th Infantry Batallion sa pamumuno ni 1st Lt. Justin Paul Chavez at mga miyembro umano ng NPA na noo’y nangingikil ng revolutionary tax sa mga residente.
Nakatanggap umano ng tawag ang tropa ni Chavez sa mga residente na may mga armadong rebelde na nangingikil sa kanila ng pera bandang alas-2:30 ng hapon kaya’t agad nilang pinuntahan ang lugar sanhi ng bakbakan.
Nakarekober sa encounter site ang dalawang M16 Colt baby armalite; tatlong cal. 45 Armscor; 15 long magazine ng M16 rifle na may mga bala; isang granada; 14 cellphone sim card; USB; isang Samsung tablet; dalawang handheld radio; at sari-saring subersibong dokumento.
- Latest