Parak utas sa nililinis na baril, utol sugatan
MANILA, Philippines – Patay ang isang pulis habang sugatan ang kapatid nito matapos na aksidenteng pumutok ang service firearm ng una habang nililinis ito sa loob ng kanilang tahanan sa bayan na Narra, Palawan nitong Martes ng gabi.
Kinilala ni Police Lt. Col. Socrates Faltado, spokesman ng Mimaropa (Mindoro, Marinduque, Romblon, Palawan) Police ang nasawing biktima na si Police Corporal Melvin Castillo Rios, 37, nakatalaga sa Police Drug Enforcement Unit (PDEU) sa Palawan samantalang isinugod sa pagamutan ang nasugatang kapatid na si Roderick, 39, isang welder.
Sa imbestigasyon, nangyari ang insidente sa loob ng bahay ng nasabing pulis sa Purok 3, Brgy. Princess Urduja, Narra ng lalawigan. Kasalukuyang nililinis nito ang kanyang armas habang nanonood ang kapatid nito nang aksidenteng pumutok ito.
Sinabi ni Faltado na tinamaan sa sentido ang nasabing parak habang ang kapatid nito ay nagtamo naman ng sugat sa baba.
Ang mga biktima ay mabilis na isinugod sa pagamutan pero idineklarang dead-on-arrival ang pulis.
- Latest