Tresurero na tinangay ng agos, narekober sa Apayao
TUGUEGARAO CITY, Cagayan, Philippines — Narekober na ang bangkay ng nawawalang barangay treasurer na tinangay ng baha sa Brgy. Karagawan, Kabugao, Apayao noong Linggo ng gabi.
Sinabi ni Lieutenant Ana Marie Lopez, hepe ng Kabugao Police Station na natagpuan ang labi ni James Carag matapos humupa ang baha may kalahating kilometro ang layo sa kanyang bahay dakong alas-8:00 ng gabi.
Matatandaan na tinangay ng malakas na agos ang opisyal matapos matabunan ng gumuhong bundok ang kanyang bahay sa kasagsagan ng ulan noong Miyerkules ng madaling araw.
Si Carag ang ikatlong namatay sa hagupit ng bagyong Quiel sa Cordillera nitong nakaraang linggo matapos na unang marekober ang mga bangkay nina Apayao board member Tolentino “Butz” Mangalao at Corporal Rommel Gumidam Jr. kasunod ng landslide sa Brgy. Dibagat kung saan dalawang tao rin ang nasaktan.
Sa report ng Cordillera Disaster Risk Reduction Management Office, taga-Baguio City ang ikatlong nasaktan sa gumuhong lupa habang 2,182 katao mula sa 617 na pamilya ang inilikas sa Apayao bunsod ng malawakang landslide at pagbaha.
- Latest