Lasenggong mister kinatay ng asawa

TUGUEGARAO CITY,  Cagayan, Philippines — Patay matapos katayin ng sariling misis ang isang 42-anyos na magsasakang umuwing lasing na lasing sa kanilang bahay sa Brgy. Bagong Sikat, San Mateo, Isabela kamakalawa. 

Sinabi ni Major Jeffrey Raposas, hepe ng San Mateo Police na nagawang burdahan ng saksak ni Leah Bautista, 42-anyos, ang kanyang mister na si Rolly kasunod ng kanilang mainitang pagtatalo dahil umano sa pera dakong alas- 6:40 ng gabi.

Isinugod pa ng mga sumaklolo si Rolly sa pagamutan pero idineklarang patay ng mga sumuring doktor habang tuliro pang sumuko kay Raposas ang ginang na umano’y hindi makausap nang matino ng mga imbestigador na nagsisiyasat sa kaso.