Guro tinodas sa trike

MANILA, Philippines — Bulagta ang isang guro matapos na barilin ng hindi pa nakikilang suspek habang nasa loob ng tricycle sa AMLO, Barangay Zone III, Sta. Cruz, Davao del Sur kamakalawa ng hapon. Kinilala ang biktima na si Felipe Capisos Niemis Jr., 52, isang Senior High School (SHS) teacher at naninirahan sa Brgy. Zone 2, Digos City. Base sa report, sakay ang biktima ng isang tricycle nang bigla siyang lapitan ng isang suspek at binaril. Sinabi ng tricycle driver na si Marvin Jamunan na magpapahatid sana sa kanya si Niemes papuntang Sta. Cruz Integrated Bus Terminal nang mangyari ang hindi inaasahang krimen, alas-4:40 ng hapon.  Inakala ng driver na sumabog lamang ang gulong ng kanyang tricycle ngunit nang lingunin niya ang guro ay puno na ng dugo at wala nang buhay. Nakuha sa crime scene ang isang basyo ng bala ng .45 kalibre na armas.