Guro itinumba sa klasrum!
MANILA, Philippines — Bulagta ang isang babaeng guro matapos na pagbabarilin ng dalawang maskaradong lalaki sa loob mismo ng klasrum ng pinapasukang mataas na paaralan sa Brgy. Balongating, Guipos, Zamboanga del Sur kahapon ng umaga.
Kinilala ni Police Regional Office (PRO)-9 Spokesperson Police Major Helen Galvez ang nasawing biktima na si Narcisa Gumibao Caay, 58-anyos, may asawa, class adviser ng Grade 6 ng Balongating National High School at residente sa nasabing barangay.
Siya ay nagtamo ng tatlong tama ng bala ng cal. 45 sa katawan na siyang agarang kumitil sa buhay nito.
Sa imbestigasyon, alas-7 ng umaga habang abala sa pagtuturo ang biktima sa mga estudyante nang biglang sumulpot ang dalawang salarin na nakasuot ng jacket, naka-half mask helmet at sunglasses. Armado ng cal. 45 pistol, agad na pinagbabaril ng dalawang suspek ang guro na duguang bumulagta sa harapan ng nagulantang nitong mga estudyante na na-trauma sa pangyayari.
Matapos ang pamamaril, mabilis na nagsitakas ang mga suspek lulan ng kulay asul na Skygo motorcycle patungo sa direksyon ng hilagang bahagi ng Brgy. Balongating.
Iniimbestigahan pa ng mga awtoridad ang motibo ng krimen at matukoy ang mga nasa likod nito.
- Latest
