Tserman, escort utas sa ambush

KIDAPAWAN CITY  , Philippines  —  Patay ang isang barangay captain at escort nito habang sugatan ang misis ng opisyal nang tambangan at pagbabarilin sila ng apat na salarin sa bahagi ng Poblacion 8, Midsayap, North Cotabato, kahapon ng umaga.

Sa ulat ni Midsayap chief of police Lt. Col. Benito Rotia Jr., kapwa nagtamo ng maraming tama ng bala sa katawan ang mga nasawing sina Alcon Guiabar Tubasan, 44-anyos, tserman ng Brgy. Tumbras, Midsayap at escort nitong si Samanodin Bacar Inok, 26, habang sugatan ang asawa ng una na si Armia Bacar Tubasan, 39-anyos.

Sa imbestigasyon, pasado alas-9:00 ng umaga, pasakay na ang mga biktima sa kanilang motorsiklo pagkatapos kumain sa Otso Kainan restaurant sa may highway ng Poblacion 8 nang biglang dumating ang apat na salarin sakay ng dalawang motorsiklo at walang habas silang pinaulanan ng bala ng hindi pa matukoy na baril.

Isa ang rido o clan war sa mga anggulong sinusundan ng pulisya sa krimen.