Pacquiao-Thurman fight pinagtalunan: 1 utas
CANDELARIA, QUEZON, Philippines — Nagkabutas-butas ang ulo at namatay noon din ang isang 26-anyos na binata makaraang pagbabarilin ng kainumang kapitbahay matapos ang kanilang pagtatalo sa bisperas ng laban sa boksing nina Senador Manny Pacquiao at American boxer Keith Thurman sa Sitio Brothers and Sisters, Barangay Pahinga Norte, ng bayang ito, kamakalawa ng gabi.
Kinilala ng pulisya ang nasawi na si Arwin Mercado samantalang tumakas ang suspek na si Mark Joseph Ayala, 19, binata.
Sa imbestigasyon, dakong alas-8:00 ng gabi, nakikipag-inuman ang biktima at suspek sa iba pa nilang kapitbahay subalit nang kapwa malasing ay pinagtalunan nila ang boxing bout nina Pacquiao at Thurman.
Sa gitna ng diskusyon, bumunot sa beywang ng hindi pa matukoy na baril ang suspek saka pinaulanan ng punglo sa ulo at mukha ang biktima.
Nang duguang bumulagta ang biktima, tumakas ang suspek na tinutugis na ng mga awtoridad.
- Latest
