Multicab sumirko: 2 dedo, 3 sugatan

NORTH COTABATO  , Philippines  —  Patay ang dalawa katao habang tatlong iba pa ang sugatan makaraang mawalan ng kontrol at sumirko ang sinasak­yan nilang multicab nang magkaaberya at mawalan ito ng preno pagsapit sa national highway ng Brgy. Lebak sa Sultan Kudarat, Maguindanao kamakalawa ng tanghali.

Nakilala ang mga nasawi na sina Noralya Kadil, 45-anyos at Yasser Utto, pawang residente ng nasabing lalawigan habang sugatan at patuloy na isinasalba sa ospital ang dalawang batang sina Yasser Silabay, 6-anyos at Aisa Blah, 10, at maging ang 70-taong gulang na si Monera Blah, pawang ng Brgy. Katuli, Sultan Kudarat.

Sa report, pasado alas-12 ng tanghali habang pauwi na ang mga biktima lulan ng multicab nang mapansing pagewang-gewang ang kanilang takbo. Kasunod nito, bigla na lang bumaliktad nang makailang beses ang multicab dahilan upang maipit ang ilang mga pasahero at tumilapon naman ang iba sanhi ng pagkasawi ng dalawang biktima.