Mag-ina utas sa road crash
MANILA, Philippines — Patay ang mag-ina ng isang mister matapos salpukin ng kapwa naka-motorsiklo sa kahabaan ng isang kalsada sa Purok 7, Brgy. Poblacion sa bayan ng Carmen, North Cotabato, kamakalawa ng gabi.
Ang mga nasawi ay kinilalang sina Villanora Librando, 46-anyos; at ang 10-taong gulang na anak na si Bernadette; habang sugatan naman ang mister ni Villanora at ama ng bata na si si Jimmy Librando.
Sa ulat ni Police Major April Lou Palma, hepe ng Carmen PNP, alas-6:50 kamakalawa ng gabi habang binabaybay ng mga biktima ang kahabaan ng Everlasting St. sa naturang lugar nang bigla silang salpukin ng kasalubong na motorsiklo.
Dahil sa lakas nang pagkakabangga ay tumilapon ang mag-ina na angkas ni Jimmy sa sementadong daan na nagresulta sa agarang pagkamatay ng misis at nasawi naman ang sampung taong gulang na anak habang ginagamot sa ospital.
Nasa kustodya na ng Carmen PNP ang drayber na ‘di pinangalanan sa ulat at inihahanda na ang kasong isasampa laban sa kanya.
- Latest
