2 patay, 2 kritikal sa road mishap
SANTIAGO CITY, Isabela, Philippines — Dalawa katao ang nasawi habang dalawang iba pa ang nasa kritikal na kalagayan matapos ang magkahiwalay na road accident sa Cagayan, kamakalawa.
Nakilala ang mga nasawing biktima na sina Cristina Ulibas, 52, ng Brgy. Nararagan, Ballesteros, Cagayan at Jansen Sian, 22, ng Centro Sur, Gattaran, Cagayan.
Ayon sa ulat ng Cagayan Police Provincial Office, si Ulibas ay nasawi matapos mag-swerved umano ang kanilang sinasakyang tricycle na kulong-kulong na minamaneho ni Joyce Paño, 45, na naging dahilan para masalpok ng Ford Ranger ng negosyanteng si Nancy Usita, 43.
Samantala, si Sian ay agad nasawi matapos masangkot sa karambola ng dalawang sasakyan ang kanyang minamanehong Maton na motorsiklo sa Maharlika Highway ng Brgy. Guising sa Gattaran dakong alas-7:30 ng gabi.
Binabagtas ni Sian ang kalsada nang aksidenteng makipagsalpukan sa kasalubong na Hyundai H-100 van na minamaneho ni Dennis Ballad, 34, ng Callao, Peñablanca, Cagayan. Tumilapon siya sa kalsada at aksidenteng nasagasaan pa ng paparating na Mitsubishi Adventure (XSC 274) ni Jayby Menita Mauricio, 31, na tumakas matapos ang insidente.
Sumuko si Ballad habang si Mauricio ay nalambat ng mga awtoridad sa inilatag na checkpoint.
- Latest