4 ‘tulak’ utas sa buy-bust
BULACAN, Philippines — Apat na hinihinalang tulak ng droga ang napatay sa isinagawang magkasunod na buy-bust operation sa bayan ng Sta. Maria at San Jose del Monte City.
Sa ulat na ipinadala ni P/Lt. Col. Carl Omar Fiel, hepe ng Sta. Maria Police kay P/Col. Chito Bersaluna, Bulacan Provincial director, nakilala ang mga napatay na suspek na sina Roberto dela Peña, 32, ng Brgy. Sta. Clara, Sta. Maria; Richard Alabado, 23, ng Brgy. Bagbaguin, Sta. Maria, Bulacan; Ijel Fabros at Christian Marcos.
Sa imbestigasyon, dakong alas-2:00 ng madaling araw kahapon nang magsagawa ng buy-bust operation ang Sta. Maria Police laban kina dela Peña at Alabado na kilalang tulak at supplier ng shabu sa Brgy. Poblacion, San Gabriel at Caysio.
Matapos na maiabot ng dalawa ang shabu sa buyer, napansin nila na may papalapit na pulis sa kanila kung kaya agad nilang pinaputukan ang mga awtoridad sanhi ng shootout na ikinabulagta ng dalawa. Narekober sa crime scene ang isang Armscor cal .45 pistol, isang Smith and Wesson cal .38 revolver, 13 plastic sachet ng shabu at buy-bust money.
Nauna rito, napatay din ng mga pulis sa San Jose Heights, Brgy. Muzon, San Jose del Monte City kamakalawa ang umano’y mga tulak na sina Fabros at Marcos.
Sa ulat kay P/Lt. Col. Orlando Castil Jr., hepe ng San Jose del Monte Police, dakong ala-1:55 ng madaling araw nang makipagbarilan ang dalawang suspek matapos nilang matunugan na isang pulis ang kanilang ka-transaksyon sa bentahan ng droga. Narekober dito ang isang cal .9mm pistol, isang cal .38 revolver, mga shabu paraphernalia at buy-bust money.
- Latest
