3 call center agent lasog, 11 sugatan sa team building

NORTH COTABATO, Philippines — Tatlong call center agent ang nasawi habang 11 iba pang kasamahan ang sugatan makaraang mawalan ng preno ang sinasakyan nilang tourist van mula sa team building sa highway na sakop ng Sitio Quipasa, Brgy. Poblacion, Mambajao, Camiguin, kamakalawa.

Sa ulat kay Lt. Col. Roy Bahain, hepe ng Camiguin Police, nawalan ng preno ang puting Toyota Hi-Ace van alas-4:45 ng hapon matapos na pumalya ang preno ng sasakyan at tuluyan itong sumalpok sa open field kung saan sa lakas ng pagsalpok ay tatlo ang dead-on-the-spot na sina Julie Ann Mae Olive, Jovert de Asis at Ian Jumahalili.

Sa pagsisiyasat ni Capt. Arnold Gaabucayan, hepe ng Mambajao Police, halos lahat ng pasahero ay mga empleyado ng IBEX Global Davao na nagpunta sa Camiguin para sa team building ng kanilang kumpanya.

Ang 10 sa mga sakay ay nagtamo ng matinding sugat habang bahagyang sugat naman ang tinamo ng driver ng van na si Joy Sobremisana.