2 patay sa kidlat, 7 sugatan
LEGAZPI CITY, Albay , Philippines — Nasawi ang isang construction worker at isang magsasaka habang sugatang isinugod sa hospital ang pitong iba pa matapos tamaan ng kidlat dahil sa malakas ang bagsak ng ulan habang sinabayan ng mga kulog at kidlat sa magkahiwalay na lugar sa Camarines Sur kamakalawa ng hapon.
Dead-on-arrival sa Bicol Medical Center sa Naga City ang biktimang si Raymund Pesimo, nasa hustong gulang at residente ng Brgy. Queborac, Naga City habang patuloy na inoobserbahan naman ang kapwa construction workers na sina Andres Bare, 51; John Paul Bare,18; Michael Bondocoy; Renier Nollas; Jasmin Han Camba; Jonard Camba at Mazzer Salik.
Sa ulat dakong alas-4:30 ng hapon, matapos magtrabaho sa Zone-3, Brgy. San Vicente sa bayan ng Canaman ay sumilong ang mga biktima sa ginawa nilang barracks (pahingahan) na may bubong na yero dahil sa malakas na bagsak ng ulan. Gayunman, nang kumidlat ay tinamaan ang kanilang barracks dahilan para lahat ng mga obrero ay tamaan at napuruhan nang husto si Pesimo na nawalan pa ng malaytao.
Samantala, patay ang 27-anyos na magsasaka na si Marvin Lascano Lanon, ng Zone-7, Brgy. Luluwasan, Balatan matapos tamaan ng kidlat habang nakasilong sa isang kubo sa gitna ng palayan sa Zone-4, Brgy. Sta. Lucia sa bayan ng Nabua dakong ala-1 ng hapon.
Tinangka pang isugod ng mga residente si Lanon sa Medical Mission Gruop Hospital pero idineklarang patay.
- Latest