Motor vs. motor: 2 rider dedo

MANILA, Philippines — Patay ang dalawang rider nang magsalpukan ang minamaneho nilang motorsiklo sa Brgy. Dado sa bayan ng Alamada, North Cotabato, kamakalawa ng hapon.

Kapwa binawian ng buhay habang ginagamot sa ospital ang mga biktimang sina Mosaiden Ricor, 17-anyos, at Allan Gumaway, 25, pawang residente ng nasabing lugar.

Base sa inisyal na ulat, pasado alas-5:00 ng hapon kamakalawa nang mangyari ang salpukan ng dalawa habang nagmamadaling bumili ng makakain si Ricor bilang panghapunan at pauwi naman noon sa kanilang tahanan si Gumaway.

Sabay na isinugod sa ospital ang dalawa ngunit maka­lipas ang ilang oras ay binawian din ng buhay si Guma­way habang dakong ala-1:00 naman ng madaling araw nang malagutan ng hininga si Ricor.